婚紗相第二回 - outdoor

佛誕當日我同佬去戶外影結婚相, 是次是婚紗相既重頭炮, 因為我同佬都鍾意戶外景. 認為咁至有feel~
當日早上10:15便到達影樓, 當我換衫化妝期間, 佬就去花墟買紅玫瑰和黃太陽菊, 之後佬至揀佢當日型仔戰衣配件~~ 我幫佬左揀右揀, 最終都係揀番佬原先揀既短領Tie同埋背心.

今次同我地影相既係Eddie同佢二個助手(一個叫阿傑, 另一個唔記得個名, sorry), 同我化妝既係Iris. 今次大家之有相睇, 要多謝Iris幫我同佬影花絮. 一行六人出發! yeah~

下午1:30便開始坐攝影公司提供的七人Van出發去, 帶左勁多物資一齊去, 買餸手推車就有咁既用途啦. 推住去老遠地方都唔使驚, 唔使手拎到死下死下. 我之前果日整定左紙包cake, 佬的媽準備午餐肉三文治, 佬買定補充體力朱古力, 絲花球, 兩雙converse白波鞋, 男仕皮鞋, 女仕白鞋, 2隻公仔, 100支candle etc.

第一個目的地就係南生圍. 先到我指定一定要拍既係南生圍小橋, 睇相版勁鍾意既景. 攝影師一到步就叫助手快d霸頭住, 咁我地至唔使等太耐咋.
企上條橋都幾驚, 勁驚跌落去. 條橋話晒畀人踩左咁多年, 哈哈. 唔好睇相以為條橋好長, 實質好短.






睇返o岩o岩影完既相，幾開心 :P


偷食

跟住第二個景就係樹林通道, 當日唔係平日, 有好多遊人同埋同樣影結婚相既人, 有d 影頭等左好耐至清到場. 不過, 都不影響我同佬興奮心情. 最深刻印象係佬要跑果幕, take左幾次至搞掂.



第三景就係草地, 一片綠悠悠既草地再加上勁猛既太陽, 相信d相會好正~~ 勁warm 既感覺~~
原先發現無頭紗造型, 有d失望, 因為原先好相版係有頭紗, 點知eddie自備埋. 勁開心.
兩隻公仔終於出場啦, 就係"豬朋狗友". 大家睇下相就知.






我同佬放棄影草地附近間爛屋. 於是再開車前往石澳啦~~

第二個目的地係石澳. 一落車就搵地方坐係街邊轉妝. 由於一直都無大鏡睇番個頭. 事後望番個造型至發覺第二個頭我唔係太鍾意....

街邊轉妝前

第四個景係石澳石灘, 企出去都要好小心. 婚紗都幾長, 好易踩到條裙跌落海....好在佬都照顧我~
因為要等浪花, 成日擺完post, 就要呆等, 又大風, 吹到眼乾, 一聽到有浪就要準備影相.



往石灘途中既小橋

第五個景就係聖士提反灣.
由於Eddie得知我同佬勁想影沙灘景, 當時收到同行消息, 石澳沙灘迫爆人, 所以當場決定幫我地飛車去赤柱聖士提反灣, 雖然dum行油都追唔切個"咸蛋黃", 但都影到醉人既沙灘景. 好開心. 多謝Eddie佢地.
沙灘腳印象徵我倆一同走過既路, 前路長長都會繼續一起走~
跟住佬為我在沙上劃上一大個心心, 仲寫上我倆名字.
更點上洋燭, 當晚有半個月亮陪伴我同佬, 感覺好sweet~
(因為iris 無跟住，所以呢度無相睇啦~)

第三個地方就係中環. 大家都好餓.... 即使我同佬車上有食乾糧, 奔波成日, 真係累了.
一到中環, Eddie指定要去美利大廈. 可惜這裡的circle k 過左9:30關了門, 攝影師無得係果度開餐好失望咁.
Iris問看間借toilet key帶我入去換晚裝同化妝. 大廈個toilet好乾淨~~ 而佬就去男toilet換衫, 同埋攝影師去m記買野食. 佬坐係街上補妝. 哈哈.

我地由係美利大廈開始，途經中環天橋, 呢個景我都十分鍾意, 因為係我同佬以前拍拖既地點. 好有紀念價值~
目的地就係立法局。








沿途有旅客用手機影我地. 影完一次唔夠要再影第二次, 我同佬都好識做. 打晒V 手勢以示歡迎~

最後辛苦左成日, 十點開始回程. 當時好在佬記起想要馬路中心景, 所以趁VAN未跟我地會合之前, Eddie幫我地影埋最後一個景-中環馬路中心, 好鬼COOL~

10:30返到影樓卸妝換衫, 找埋尾數就離開啦. 上車前仲食埋個宵夜添~~ 哈哈.

yeah. 終於大功告成. 好期待睇相呀~~ 三星期後就可以揀相啦. 職員話當日主要係執左色, 未執相, 所以要同designer 講想執成點, 唔好見到少少瑕疵就foul相呀.

但我同佬都好擔心out晒budget. 點算. 好鍾意d 相又慘, 但又好想d 相好靚~

後記: 由於影outdoor 又大風又有太陽，好易眨眼，每次助手阿傑想影相既時候，我地都眨眼，阿傑勁想拖我地出去"斬"。經過今次outdoor，而家要考慮緊結婚當日需唔需要轉數碼機，以防重要既相眨左眼.


拖我地出去"斬"既助手傑

首輪結婚照

2008.05.03星期六早上11點半揀相.
新天地揀相手法都幾systematic.
首先畀雙人第一個造型我地揀, foul走果d 會即刻打x.
然後分別揀雙人第二個造型及第三個造型
跟住, 揀女單人照, 又揀男單人照

由於第三個造型唔係好得, foul走勁多, 一見大頭就foul, 一見表情生硬就foul, 重覆或類似既post或景都foul, 尤其foul得最狠係秋葉景, 佬一見到畫在牆上的假樹景即foul. foul foul foul.
仲有, 佬既casual wear look, 著住牛仔褲但上身著果恤衫但頸喉鈕扣實, 下身超casual但上身超formal, 超級唔match. 都算係影相中最失敗既地方.

總括黎講，相既質素都算ok，室內景都算唔錯，最重要有我鍾意既classic 宮庭相，都達到初期到新天地影相既目標，ｙｅａｈ！～
(揀相小插曲, 仲揀梗雙人相時, 媽就打黎, 落懿旨要揀番上次影相當日拎返黎果張木馬景)


主力要係廿張相既相簿, sales話相薄通常以相同既景黎對左右兩頁，所以比較colorful既景, 每個景兩張, 咁就最直接簡單啦.
因為仲有第二次outdoor 結婚相，所以都唔想加太多相，最後揀多左5 張，總共25 張相，加多$800 就走人。
sales 之後就狂sale 加uv coating，又話特價，但係最平果款coating 都要$90/張，要額外加多$2000，因為覺得太貴，所以無加。(其實係外面搵其他公司做coating 都係$10/張，好彩無加)

最後sales問我地要唔要畀500一張為deposit借走6張相, 限一星期內還. 佬好爽快要求借相. 目的就為左係呢度跟大家分享一下，畀大家欣賞.

想睇番原圖睇呢個album
http://www.flickr.com/photos/9136112@N05/sets/72157604894864040

(首先係兩張最鍾意既宮庭相)



(酒吧 - 佬似唔似撩我飲酒呀~)


(心型鞦韆 - 呢個就係第三個做型，唔係咁鍾意頭上既小帽子，感覺太過grand)


(葡萄園 - 油畫就係揀左呢個期，不過係正面既，暫時無得睇)


(教堂前 - 用左魚眼鏡，感覺好得意)

終於影左結婚相啦!!!!

成日以為影結婚相有排都未到, 點知日子過得好鬼快.

又成日覺得結婚相唔易做到, 點知28Apr果日又過左~

影相之前, 朋友曾經問我是否緊張, 其實我一D 緊張都無, 自己都覺得奇怪.

但影相之後, 我同佬都開心到訓唔著. 勁開心~ 我地終於影左結婚相啦!!!!

影相之前一日

我同佬去了鑽石山交收從web 買的絲花花球. 老闆好好人咁帶左我指定2款花球供我選擇. 花球配埋襟花, 而我要求加錢配埋頭花(可惜最後無用過).

我特意去買絲襪, Anita教我買近膚色的, 影相效果會好一點.

還有去買佬的黑襪(點知買漏白襪). 仲有, 去買保濕面膜, 為影相作準備.

當日我去左Estee lauda 護膚workshop, 即場敷左個mask. 哈哈.

而佬就扺錫咁係屋企幫手執齊d 影相用品 (禮服裇衫, 戶外裇衫, 牛仔褲, 波鞋, 花球, girdle, 水, bread, 乾濕粉卜等等)

到影相當日, 8點多佬就叫醒我, 但我仲係好眼訓, 勁辛苦至起身, 眼袋好腫同好紅.

8點9 就到新天地. 我換上橙黃色晚裝, 坐在化妝室化左好耐妝, 勁叫化妝師遮住我的黑眼圈. :p

而佬當日至揀禮服, 然後化妝. 由於要改西裝, 等到我地開始影相都仲要等西裝.

攝影師叫浩文. 同我個佬個名係剛好掉轉. 真係巧合. 先在走廊試影幾張, 在數碼相機看番個妝及笑容, 及戴披肩與沒有戴披肩的效果. 本人覺得沒戴披肩比效好.

講多無謂. 一齊睇相啦. 我忍唔住想即刻有相睇同拎走畀媽咪睇, 所以加左200蚊買4張細相.

2008.03.24 櫻花蛋糕

珍惜復活節最後一天, Candy 來了我家一起弄她之前送給我的"無印" 蛋糕套裝 (材料+工具).

對於初哥來講, 用呢個kit set 最開心, 因為按照其指引就好快及好易咁做出美味及美觀的櫻花蛋糕.
勁有滿足感. 嘩哈哈. 它仲包埋個波浪cake mould, 呢個真係好吸引, 因為平時我只會用普通圓模. 仲要它包埋透明膠袋, 畀你整好之後切成一份份心形袋入去, 極之美觀, 送畀人都好靚~~

我平時唔敢整其他cake. 一黎嫌煩, 二黎驚唔知整左d 乜出黎. 但好在Candy介紹呢d 套裝畀我, 可以從中學習, 又可加強自信. 正~













當日我同佬都捉左Candy幫眼睇下web post 出黎既花球款式, 亦捉佢陪我地行新港城, 幫眼睇下牛仔褲同波鞋(影結婚相用). 但最後有收穫的是她. 哈哈. 佬勁話點解佢買唔到野. 幫眼果個就勁買到野. 嘩哈哈. 世事係咁. 你愈想搵既野就愈唔見. 無意的就搵到. 問你信唔信. 哈哈.

行尖咀

2008.03.25 星期二. 當日出了尖沙咀洗牙, 因為佬話影相前要洗牙.
當日約了Wendy陪我去百利, 拎番化妝張單同埋買佬果件直紋恤衫.

拎單果時, 我聽佬話問阿ling 買乜假眼睫毛款才襯我, 點知阿ling 好好人. 揀左一對o岩我眼型既假眼睫毛, 我問佢幾錢, 佢索性送左一對給我. 謝謝你阿ling ~~

由於該舖大清貨, $50 就買到了. 好抵. 但我同Wendy等該舖開門, 就等到好倦. 期間去了附近睇護膚品同埋衫.

之後Wendy陪我出去太子睇trinice flower 同秋子花藝, 拎package資料同埋睇相版.

我地行到好倦. 辛苦晒Wendy~

復活節假期

復活節假期的第一天, 我同佬雄心壯志馬上籌備結婚事項, 目標包括同花女玩, 花球、婚戒、襯禮服的恤衫及皮鞋.

首先去了花墟看絲/真花球. 原先以為價錢跟當年大學畢業影相的束花差不多(大約百幾到二百蚊), 想不到原來結婚花球最平的絲花花都要四百幾蚊, 真花的要五百蚊以上, 真是嚇呆了. 途中看到一間舖有租絲花花球(連襟花)套餐, 買的這樣貴, 怪不得有租借業務啦~ 網上訂絲花比較便宜, 最平的有二百五十蚊以上. 絲花花球網站在esdlife是好評的包括:
http://rhythmwedding.sinahappy.com 及
http://triniceflowers.com/flower_bouquet.htm.
都是喜歡有拖尾，粉色+紫色系列，而且唔要大花花，暫時睇中前者的H559/H563/H564
前者的花球size比後者大及價錢比後者平宜一點點. 我同佬的初步構思是絲花花球在網上訂, 影結婚相用, 然後在結婚當日改成花車頭花, 這樣一物二用都算划算吧. 而真花花球就在當日才使用. 但真的要計算一下怎樣才算是最划算. 佬, 靠你啦~

然後第二目標是結婚戒子. 可能你會想結婚當日至用, 做乜咁著急要買. 但我同佬想婚戒是影結婚相的道具之一, 以作紀念~ 我同佬先到附近商場看了幾間金舖(大舖及細舖都有看)然後一出旺角就買到. 詳情我留給佬親自剖白啦(但佢未必肯講). 嘩哈哈.

這個是原先看中的款色























最後我同佬買左呢個

係金都看恤衫, 直紋及ruffle由160蚊至2xx蚊起. 價格都ok. 順手看絲花球及襟花,兄弟及姊妹花套餐, 見到一間比花墟便宜, 見職員服務態度又ok. 仲以為值得幫襯. 點知回家一search forum就有劣評, 馬上由考慮清單剔除. 佬然後打電話同個朋友傾租花車事宜, 順便問埋對方買了恤衫沒有. 這個朋友回答在百利商場買了恤衫, 價錢160 左右, 所以我和佬去了尖沙咀一趟. 點知被昆了, 因為找不到這朋友口中所說的店, 該商場所有恤衫都好貴. @_@

不過在金都地舖 (向馬路), 買到一對米色的女裝皮鞋, 極之便宜, 40蚊咋~ 哈哈.
雖然唔係晚裝鞋, 但夠實用, 因為平時著都得.










打算買黑皮鞋及白波鞋影相. 反而不想買白皮鞋, 認為平日很少機會著. 但波鞋比較實際及影外影相方便及活潑~ 黑皮鞋要求光身, 在百利看到一對, 價格大約400蚊, 要訂造. 隔天在附近商場看到一對hush puppies都夠光身, 價格大約320蚊. 佬正在心煩買哪一對皮鞋.

假期的第二及三天, 我同佬繼續看影結婚相當日有關的裝備, 包括佬的牛仔褲、恤衫(禮服用及外影用)皮鞋白波鞋... 睇中了全白波鞋、converse 銀波鞋, 佬又要苦惱買邊一對至好.... 佬要加油呀~

奇華特之旅

2008.3.19 下午約了anita 去買girdle, 佢帶我去總統商場一間小舖, 似屋村小舖. 但竟然有很多女人排隊. 排了不知有無一粒鐘. 隔離舖的老闆很眼紅, 仲撒賴因為門口有太多女人排隊影響佢生意 (佢聲稱佢賣男人野)

入到去, 完全有consultant service 感覺, 佢會拎住軟尺同你度邊度唔標準, 然後教你著乜內衣至o岩, 又會度身修改內衣覆試幾次直至o岩身為止. 佢賣的貨又唔會特別貴. 都係一般的貨, 但佢度身修改及諮詢服務至係賣點. 唔怪得有咁多女仔排住隊都要幫襯. 勁.

女仕們, 大家可以試下呢種service.

2008.01.21 試妝第二炮

隔了很久才有空把年頭試妝的相上載. 今次決定了試亞ling, 原因是她的服務態度有保證(不會有藝術家脾氣) , 至少結婚當日不用親戚姊妹冒受氣的風險. 試妝是進一步確認她的她妝技術是否適合我~ 哈哈. 我跟佬諗左好耐至有呢個決定~ 哈哈. 人生真是多決擇.

在此多謝wendy 陪我地上去睇相版, anita & connie 陪我地試妝及楂機影相.

講多無謂. 畀大家睇下d 相先. 我介紹了快將結婚的mandy, 她搵亞ling試妝亦都決定book佢. 同朋友share好野, 我同佬都好開心!

妝前妝後我唔post出黎啦. 費事啦. 但我同大家講妝前妝後的確有magic. 有興趣睇可以直接contact我.




唔識對鏡頭, 好在connie幫我影相幾張, 又教我點望鏡頭至唔似影證件相咋.






側邊d 頭飾, 紅花花是早上襯褂的




connie話我同佬一齊影相笑得最自然. 梗係啦. 未來老公仔黎架嘛


未著紅當當的褂前,我會覺得個妝好紅, 但係……


襯埋褂就o岩o岩好


婚紗頭, 配紗要紮起個計



亞ling話夏萍頭係最經典, 十年後睇番都覺得好靚.


再黎一張合照




將頭髮放番落黎, 就有d cute 感覺. 但仲要留長d 頭髮至得.


影左好幾次, 對住鏡頭至似d 樣



其他髮飾的變化












睇完d相覺得點呢? 試妝費用左$380. 第二天我跟佬便落訂book 亞ling啦
我同佬決定要全餐 (全日新娘化妝及髮型套餐 $4300) 包日妝 (裙褂及婚紗)、晚妝(裙褂、婚紗及晚裝)、修飾眉型(眼睫毛2對) 、多款髮型設計、假髮備用、髮型噴色及閃粉 、包新郎妝, 加888包媽咪奶奶及伴娘 (服務時間由7:30am至10:30pm).
若果早過7:30am, 便要每小時200蚊及的士錢.

各位姊妹, 係時候商量姊妹色系啦. 香賓金定粉紅?

海逸酒店 Harbour Plaza Hotel (補相)

心形韆鞦


大堂樓梯


無柱大禮堂 + 水晶燈

擬結婚通知書

林律師做事果然有效率，昨天己收到"擬結婚通知書"，
明天就會到 林律師 office 與林律師見面及正式簽署擬結婚通知書，
而且會講解一下當晚證婚流程及安排。

收到了通知書，更有邁向結婚既感覺 :)

MUA: Mimi Vs Ling

Mimi : http://www.fotop.net/starimage888/OTHERS?page=2
Ling : http://www.100fun.com.hk/video?a=browse&mmid=15

補返兩條 link，大家幫手睇下邊個mua好~

哪一個mua 好?

Mua還未訂好. 怎樣辦? 給爬頭的朋友已經訂好了, 我同佬停了半年沒有籌備, 已經遠遠落後. 最後有舊中學同學Rose 經Nancy得知我2008結婚, Rose亦是這一年, 所以她facebook contact我. 她很好人, fwd 了很多mua 的資料給我. 我問過catis , 但她在我big day當日已被人book了. 然後爬我頭的Ivan介紹了mimi, 亦約了她到旺角看相版及package 介紹. 我亦send 了email 給wing 問quotation. 我個佬的朋友的姐姐亦介紹了ling 給我們. 最後由於不想再三心兩意, 所以暫時先考慮ling vs mimi.

找mimi當日約了Anita及Wendy來幫手看看相版. 當然before-after 既相片勁有effect. 化到新娘雙眼很有神及很大很靚. 而hair 我亦不覺得”娘”.當時真是有點衝動buy 她package . 但未經試妝, 妄下決定又怕自己後悔. 試妝要給五舊. 不能在buy package時扣回. 而package 有4000(早1妝及晚四妝及跟晚裝hair包頭飾, 包伴娘, 卻不包奶奶媽咪及新郎)及5300 (全日貼身補裝, 早1 妝及晚裝四妝及跟晚裝hair包頭飾, 耳環, 頸連, 包伴娘奶奶媽咪及新郎1妝), 兩種. 還有package包括1次試妝(即是confirm package至有得試妝, 性質跟之前提的不能扣回的試妝不一樣), 及1 次final傾衫ordering 及試各晚裝的hair. 這一點其他的mua 便沒有提供了, 亦是我喜歡的, 因為這樣才對於當天整體打扮更有把握, 總好過到時化了個妝及set好了頭才知原來樣子怎樣… 好醜都要接受. 咁就大鑊啦.

esd forum有人post 出來分享過很mua service的經驗, 有的說這位mua 脾氣差, 我第一時間會怕spoil當天喜悅的心情. 但想真一點, 若果她真的有實力化得我得靚, 我想我不會介意她的語氣呱. 哈哈.

另一位是ling,全部forum都是贊她技術好及服務態度好, 但我還未約到她看相版及試裝. 她的試妝費比前者便宜一點. 但各有不同的費用. 例如前者早上要的士費, 後者過七點半不用收的士費.

再有最新消息, 我會盡快post 出來~

2007.12.30 外租試衫Part II

這天十二點半是新天地第二次試外租衫. 這天我約了姐姐. 但她遲到, 我跟佬有點擔心只得我倆試衫, 於是臨時班了人馬來幫我揀衫. 幸好找到兩位朋友(Candy &Van)有空, 先後一點及三點接力到來幫我們~ 感謝他們不介意我倆的突然約會~

這天天氣很冷, 還要我穿得很少, 很辛苦… 連幫我試衫的職員都說我冷到皮膚發紫! 可是這次比上一次輕鬆很多, 不用試很多件婚紗跟晚裝. 職員一早安排了試新款, 然後再試上次remark了的衫. 這樣的策略比較容易叮走出局的衫.

姐姐好像兩點到來, 亦幫我評分選衫. 其實她的comment亦很貼切, 新天地的衫沒有什麼驚喜. 可能新天地的風格是比較年青或不太隆重. 婚紗一直未選定, 由於有一件很閃vs一件有袖的比較classic 款的婚紗令到我拿不主意. 第一件婚紗我相信照相會很漂亮, 但另外一件有袖的, 其實我一直理想的婚紗是classic懷舊的款 (當然不要"娘"果種啦!) 但又怕有袖會影得我比較橫…不知怎樣才好>.< 下一次試衫是最後一件, 各位姊妹, 記得要幫我揀啊~

由於沒有多件一眼看得上眼的晚裝, 所以很快就把試晚裝完. 特別要提一提有一件黑色跟深紅色為主, 款式似小時候的公娃娃衫. 但在場各位朋友加上我個佬一致認為它是很恐怖的lolita服裝, 令人聯想某個game (不記得全名, 好似叫silent hill). 當場職員呆了, 無聲好出. Heehee. 有點搞笑.

相反, 有一件銀色單調的波波裙, 大家卻一看就覺得很適合我. 當然我自己也覺得很simple but elegant. 想把它作為送客晚裝~.

另外, 有一件綠色的, 亦很漂亮, 但我們沒有選它, 不想當晚有兩件差不多色系, 唯有放棄它了.

還有, 有一件是深紅色的亦是心水之一,在上一次試衫亦是shortlist之內, 由於它比波波裙較輕便, 敬酒就最方便了.

最後一件是紫色 (它是品牌), 就是上一次post 出來的一件. package 只包的一件品牌, 額外多一件品牌, 便需要加五舊, 而剛才說的有裙古典款婚紗便是品牌之一, 增添我的猶豫.

試衫途中, 我個佬一直問我… 要三件抑或四件晚裝好… 四件便要額外加一件的錢, 三件我便不用換那麼多次衫. 適合我這懶蛇蛇~~ 我一直拿不到主意

幸好最後confirm 了兩件晚裝. 姐姐亦以極速選定伴娘裙. 讓我來介紹一下.
伴娘裙是線條簡單, 大家都覺得很高貴, 所以姐姐二話不說拍了板. 哈哈.

它是敬酒晚裝, 貼身輕便

它是送客晚裝, 感覺有一點cute