咁難頂的人

頭先姐姐同我講佢唔知原來屋企樓下有港鐡o都o都慳1蚊機.
我話我知. 有左無耐.
佢就話我好唔話佢知. 即時反應梗係. 我都唔知你需要, 點會諗起話你知.
佢就開始話我被動, 無理人感受. 又話我同佢少溝通.
呢個係你屋企, 你平時都唔落街, 我都唔知你要用. 我一日見咁多樣野. 點會同你講晒.
佢就話我少同佢分享.
我反問佢:你都好少同我分享. 佢竟然話唔係. 佢有同我分享. 只係我無聽.
佢點解成日都將責任放係人地度!?!?!
佢話同我講野, 我就打呵欠無心機聽佢講野. 我話佢平時咁夜返屋企, 返到黎我都係時候訓.
佢就話唔係講梗呢d時間, 係平時白天時間, 我話你咁晏至起身. 我就要事要出街. 點得閒聽你講野.
佢又話唔係講梗呢d時間. 總之佢要怪我點都拎到野出黎數. 我腦海入面, 正正常常大家見面時間跟本好少.
佢平日夜訓遲起身. 見到面傾計至奇.
佢淨係著眼我生活節奏要遷就佢. 佢有無理過人地架!!!
勸佢生活節奏好d. 佢都依然故我.
以前都為左佢d臭脾氣同自我中心, 搞到我地嘈. 咁我唯有少d招惹佢啦. 估唔到而家咁樣都得罪佢.

昨晚佢仲話點解d 人成日認錯佢係妹妹我係姐姐. 唔係因為我外表, 而係因為我心態.
我問佢係乜心態佢又無答我.
梗係啦. 畢業到而家. 佢一直自己搵自己洗. 自己拍拍蘿友就搬左出, 養家睇住媽咪到媽咪病重都係我一手一腳睇住. 未畢業就憂心工作養家, 又要還loan. 時時刻刻都擔憂. 有邊個同我分擔呀?!
媽病左, 醫藥費都令到我好擔心, 又擔心無人照顧媽咪日常起居, 送媽到二哥住都要錢, 又要顧媽感受, 又要顧埋媽同二嫂相處, 又要擔心媽唔肯食藥, 又擔心媽服藥副作用要醫治, 個個week都帶媽去睇skin dr.
數都數唔盡各樣擔心. 全都係佬同我分擔. 姐姐只著眼於我因為憂心而"面口唔好", 令到佢唔開心. 唔想見到我.
總之我滿肚怨氣, 有誰共鳴?!

home office

呢個星期在家上班 (論正式算係人生第一次)

因為上週office樓上有確診過案, 跟住上頭出左封電郵話大肚員工可以申請work from home.
咁危險, 梗係申請啦.
雖則好多人都話無當年sars咁嚴重, 但無人知大肚婆染病對胎兒有乜影響.
我實唔會拎dodo黎冒險!!!

都唔知係咪咁o岩遇著剛剛... home office 仲忙過平時... 無停過手咁濟...>.<
放工亦都遲過平時...
唔知係咪上司同同事覺得我係屋企實會好得閒, 所以勁assign job畀我呢...

不過佬勁勸我. 每天就慳番2個小時交通時間. 同埋避免外出感染既機會.都值得既!

不過在家工作有樣野唔好. 就係得自己一個坐係屋企, 公司發生乜事都要等人update至知....
一係就自己勁問. 但人地忙梗同時, 自己勁問人有無野update自己就會畀人感覺d煩同埋唔係幫梗手...

充實的星期六

媽咪準備班第二堂:
今堂教準daddy mammy買bb 物品, 其實很多我同佬已經準備. 但即管聽下護士講乜啦.

我地jot了一些筆記, 是我們之前沒有注意的.
1. 入院用品: 帶廚房紙巾
2. 沖涼水溫 ~ 38c 或用手"月爭"試水溫
3. 臍帶用清水清潔便可, 保持乾爽
4. 臍帶如有發炎, 才用酒精
5. 臍帶的清潔在沖涼後進行最好
6. 首6months, 純母乳
7. 6mon ~ 2yrs, 母乳+其他食物

0/3baby床:
下課後, 62 幫手楂車送我地去一田拎0/3bb床返屋企. 當晚我們同埋姐姐一齊砌床, dodo係咪好開心呢. 你有新床仔訓啦. yeah yeah

游水:
原本睇天氣預測話有雷雨, 所以諗住去agent搵工人就算, 點知見到咁好太陽, 我同佬返折返返屋企拎游水用品去科學園游水. 點知去到泳池, 陽光開始消失... 唔係咁玩野呀化...
到我游完入更衣室, 見到救生員放工, 我都覺得怪, 做乜咁快放工. 點知原來我地上水後, 就有thunder...
都算好彩, 總算游到水.

搵工人:
返到mos, 我地就去agent睇video揀海外工人. filter走左一d. 留底2個作考慮. 等埋26/6果日的新一批海外傭工, 希望快d揀到個工人摤dodo啦.

砌bb床:
dada好努力, 身水身汗咁砌床, 辛苦晒dada. 我幫dada影左相. 遲d再post出黎.

果日真係好倦呀.... 但做左好多野.. 真係要記底佢. 否則我實唔記得自己咁勤力.哇哈哈.

忙碌的一天

星期五安排了我到健康院做耐糖測試.
果杯糖水真係難飲.. 吞落去果下甜到拿喉....
飲之前抽了一支血, 坐兩小時後再抽一支血.
若果星期一沒有電話通知, 我應該沒有妊娠糖尿問題.
希望一切都ok啦.

之後我到新港城街市食盅飯做早餐及午餐, 返到屋企都差不多一點半.
三點我要去到中環看皮膚科醫生, 看來我唔夠時間做日式芝士蛋糕....
2點9我便到逹, 這時我排第二. 醫生說我可能掂到dirty野, 皮膚過敏, 給我藥膏.
他看到我的肚便問"你唔係大肚呀嘛?!"我答係呀, 唔好畀藥我食呀.
他說ok. 病歷會寫明我大肚. 叫我放心.

之後我離開clinic, 行去ifc, 再去pier 7 坐船到尖沙咀.因為當晚約了friend食火煱.
咁樣行法.. 我累透了.. 差不多到半島中心德興火煱時, 我雙腳累到差不多不能動... 胃仲開始痛..
我趕忙買三文治醫肚, 驚餓親dodo.
當晚火煱... 認真激氣. 食了成晚都黎唔到一碟菜, 齋佷肉好咸好濟...
職員一個二個態度好差... @_@
最後有個經理班到菜畀我地. 我地叫佢做"德興哥", 因為佢夠power 班菜. 哈哈.
食完開始有番d energy 返屋企.

健怡月餅

昨天早上很早便醒了, 又訓唔番. 就諗起雪櫃仲有紅豆沙蓉, 又諗起睇一本懷孕雜誌, 教人整健怡月餅, 看看鐘有時間上媽咪準備班前試跟下呢個食譜做喎~

食譜中的份量減一半, 因為我不想做太多. 想起自己過重. 有可能近日做太多cake(做完自己都會食下)所致...

當中要做水皮和油皮, 但水皮實在... 太水了. 我十分懷疑食譜份量有錯.. 實在太稀跟本搓不到形... 於是我勁手高筋粉補救...

雞手鴨腳搞了一輪.. 總算整完入爐焗.. 我今次沒有影相, 因為覺得唔好睇. 覺得有d失敗...
算啦. 下次有機會至再搵過好d食譜再試做啦. dodo出世應該剛過中秋. 可能幾年後至再做lu.

佬一起床唔見左我. 出黎睇到我搞搞震, 勁話我曳曳~ @__@

勁食+過重

星期二我去健康院產檢前, 約了anita 去食lunch buffet.
一開始就拎dessert. anita見到我咁都呆左...
跟住我答佢我好想食甜品, heehee
之後食完熱食, 都覺得飽飽地. 跟住又再拎cheese cake. 點知..
勁食3 round都好開胃. anita話我個bb 可能鍾意食cheese cake.

下午返去健康院, 姑娘話我重多左, suppose我而家60.xkg. 但我而家係64.3kg..
重多左大約8磅... 佢叫我唔好食太多, 跟未懷孕前食量應該差不多再加多一杯牛奶便可.
我跟她說, 有一晚我食勁都無飽既感覺... 好恐怖... 她便說我不一定要食到有飽既感覺.
或者勁食菜來填飽個肚. 仲要做多d運動, 唔可以跑步, 只可散步或游水.

過重我真係好驚呀. 而家仲有3個月, 咁快就超重, 之後點算喎?!
dodo~~ 我會努力架啦. 希望自己唔好太肥, 做多d運動你可以易d"捐"出黎~~

為dodo的小小改變

急不及待要剪短, 因為近日覺得天氣好熱, 頸尾頭髮很辛苦好焗.
所以同anita講我想剪頭髮, 於是今個星期一晚anita便帶我去中環salon.
開頭髮型師都唔肯幫我剪太短, 但聽到我馱bb同埋遲d揍bb, 就願意剪得短一些.
剪完一身鬆晒, 清爽好多~~ 我仲要求修薄, 因為我天生頭髮厚~
佬同我講, 到我生完/或將近生就可以再剪多一次. 揍dodo會更方便.
heehee. 為了dodo, 長髮了差不多9年的我, 很樂意剪短~
為了dodo健康著想, 堅持了多年不曬太陽游水, 怕惡化雀斑, 現在肯在陽光下游水....
我的雀斑大達左啦... 嗚嗚....
要買番支防曬用至得...

隔左一天.. 我發現..我左邊頭髮長過右邊?! 點解之前唔發現?! 好奇怪.. 算啦. 我暫時唔會理佢住.

海洋公園之旅

為了準備呢次旅程, 我同老公做左好多野.
首先, 就係食左隻美心雞. 做乜要食雞雞?因為美心有海洋公園門券優惠, 買第二張有半價.
後來發現惠康買滿60蚊就可以七折買海洋公園門券. 於是叫99陪我地一齊去惠康買野. 點知未畀錢, 同收銀講要七折優惠, 佢就馬上搵2張飛畀我地. @__@早知唔使買野啦~

原本端午節去海洋公園, 點知之前睇天氣預測會落雨, 就改左星期日. 到端午節當日, 成朝早都無雨, 一午只有少少雨, 早知果日去啦~~

星期六我整天都在準備食物帶去海洋公園食.
1. 合桃蛋糕仔. 今次份量比起星期二晚試做的份量多一點.
2. 焗番薯. 真係好正. 焗到番薯肉離左皮. 收乾左水, 好甜. 好在99買得番薯夠靚, 至咁甜同稔
3. 焗全麥麵包. 中種由姐姐準備, 可惜今次無之前做的鬆軟, 唔知出錯左哪裡...

到左星期日, 我早上仲好想繼續訓架. 但老公就叫醒我, 因為想同99和62飲茶至出發. 佬同我講, 今次係第一次同dodo去海洋公園, 叫我快d起身.

62楂車, 所以我唔覺得太辛苦. 10點去到已經有好多人係度啦. 買票都等左好耐.
一去到就想搭熱氣球, 覺得都幾穩陣, 所以排隊啦. 點知有工作人員企係我附近一陣, 就走埋黎同我講"唔使懷孕架呵?"我答佢係. 跟住佢話我唔玩得, 因為可以升到空中會撞到.... 原來我唔玩得...

跟住看所有遊戲都唔畀孕婦玩, 包括觀光塔...佬係咁話唔抵呀~ 但我又覺得難得有機會馱住dodo四圍行下, 仲睇海豚海獅雀鳥花草樹木. 真係好開心呀~

勁多人買票
人山人海
熊貓+海洋公園標誌
我想坐的熱氣球呀~
纜車上
魔法三人組
亞洲動物天地中的熊貓仲好睇過平時睇開果兩隻
小熊貓好可愛
睇完動物,又可以欣賞花花
睇完金魚館, 出黎影張有中國特色既相. 好似新年. 哈哈