孕婦裝

今晚juana約我去買大肚衫. 她說要買褲子, 我便想看有沒有長身大肚衫.

撞啱wendy都得閒, 所以撞埋一齊.

藍田商場好似迷宮, 行了幾圈才找到該舖. 點知到了舖, juana話唔使買褲, 搞到店主、juana、wendy三對眼望住我揀衫. 搞到我唔買又唔好意思...

其實昨天己經同wendy在銅鑼灣買了一件濶身藍色衫, 之前已托sam在台灣訂了兩件大肚衫, 之前第一次買大肚衫時買左一件衫, 最後我在該舖買了三件大肚衫, 9折再飛零頭後共四百元, 其實都算划算.

但說到底, 我沒想過買這麼多衫, 唔知dodo 瞪大雙眼"目及"實do媽呢. heehee

臨離開舖之前, 店主話用60蚊就可以換一個側睡枕, 話產前可以訓產後可以畀bb飲完奶防止嘔奶時窒息. 但我當時沒心動, 因為我已有一個小枕頭. 點知離開店後, juana至話果個枕至有用. 佢個女傷風鼻塞訓高可令鼻水流番出黎. 講到我心郁郁, 因為關乎到dodo喎. 所以即刻返去+60蚊去換啦.

讓坐

星期六早上去看婦科途中坐馬鐵, 第一次有人讓坐, 那是係一位太太.

我當時反應係唔使啦, 唔係咁嚴重呀

但對方盛情難卻, 唯有接受.

跟住佬同我講, 原來我個肚都幾覺眼, 唔怪得有人讓坐.

但過了幾天坐地鐵, 沒有人讓人, 我心諗... 可能衣著問題避住左個肚.

胎動

自從去過健康院, 我就感覺到有胎動了.

感覺初頭就似腸有氣泡, 但後來再諗真一點, 就似係胎動了.

現在, dodo一動, 我就覺dodo好有活力~ 我好開心!!

係do仔定do女?

今日一早就起身啦, 因為訓得唔係咁好, 唔知係咪有d緊張呢?

今日第二次見私家產科醫生. 目的係睇oscar report, 照u/s, dodo係仔定女, 問下腹抽住痛等問題.

未見醫生, 我體重竟然係60.6kg?! 星期四去健康院至係58kg, 做乜過左幾日重左2kg?!救命呀~~~

醫生一見我拎份報告出黎, 佢就質問點解唔係政府度做? 又唔係醫生轉介度做? 而係去化驗所度做.
我唯有答係朋友介紹, 但原來唔包解釋檢驗結果. 醫生又話威爾斯係權威 #__# 都過左去啦, 仲講咁多做乜.

跟住給醫生看政府果份病歷表, 作基本記錄. 然後就照超聲波, 照到spine, head, hands, legs.
今次唔覺dodo好活躍, 可能肚裡空間減少了. 跟住再聽心跳聲. 佬反應無第一次咁興奮了. 但我地再次見到dodo都好開心, 因為是次目的都係想看下dodo就放心. 再問醫生係仔定女? 醫生極速咁望左一望就係"好似係仔" 跟住老公就話我夢到抱住do女既夢唔準啦~

照完返埋位, 醫生竟然影左張dodo唔清楚既相. 仲話我想睇心跳?!我都無咁講過喎. 我有d失望囉, 照u/s一來想確定dodo ok同埋為dodo影相留念嘛. 佬叫我算啦. 呢個醫生明顯細心過之前睇果個.

問及醫生點解訓平個人, 一笑就抽住痛. 醫生話正常喎. 只要抖下唔再痛就ok架啦.

再問我自己買鈣片食有無問題. 醫生問左我牌子跟住就ok. 醫生再開vit丸畀我食, 若果食左無乜事就可以自己配一直食到餵人奶都可以食.

關於疑似do仔一事, 佬跟住同我講, 等埋下週照結構至碓定仔定女啦. 佬講笑咁講, 話do女可能玩野, 擺個手指尾出黎扮do仔呢~~ 我哇哈哈大笑.

由於我近排鍾意食烏冬, 所以佬帶我去食烏冬. 跟住行左三間online baby shop 既樓上舖位同埋行wingon bb部, 期間我好快又餓, 所以食拉麵. 跟住再行花園行同埋新世紀荷花同bb shop. 好少可可以行咁耐, 平時行一陣頂唔順就要返屋企抖架啦. 我自己都覺得有d出奇.

我地諗極都諗唔掂要乜bb車好. combi 係輕(3.9kg) 但坐唔得耐, 因為座住窄. maclaren 可以坐到四歲, 但車身重(7.xkg). 若果要combi到dodo 兩歲幾就換輕使的bb的士.
真係幾頭痛...

bb床佬就prefer 摺床, 因為房間唔係太大, 摺得埋會方便d. 0/3 baby同baby star 都有摺床. 但諗梗吉吉同wingon邊個discount會多d呢...

由於覺得仲有時間考慮, 唔使咁急呀.
其實同佬一齊, 買野會無咁衝動. 我好欣賞呢點. heehee

再聽到心跳聲啦

今朝4點幾有support call, 嘈醒左佬, 真係對佢唔住.而我知佢醒過之後訓得唔好.
我都一樣, 好在今天請左假覆診, 可以訓耐少少, 補番一d.

今天第一次返健康院覆診做產前檢查. 今朝留左小便. 又試定部手機錄音.
因為今次想錄底dodo心跳聲畀佬聽. heehee

老公好細心咁題我食完lunch訓下覺至好出門, 佢知我好易倦. 我都好聽話.

到左健康院, 我排55, 驗左尿ok, 體重58.8kg, 量血壓, 跟住跟號數等.
但覆診隊排到3x. 我心諗咪有排?!

好在有講座廣播, 有興趣就入房, 今日主題係產後護理及家庭計劃.
講座係播帶, 其實大部份都放左上網了, 聽覆診姑娘話唯獨一個題目係姑娘演講, 非播帶, 就係"婚娩的認識". 我mark底何時有這講座, 可以夾我下一次覆診.

真好. 聽完講座, 感覺唔使等太耐
派講座筆記和相關小冊子, 包括: 講座筆記, 盤骨底肌肉運動 (防產後失禁), 產後運動 (產後修身), 避孕常識 (產後唔使咁快再有bb, 有多啲時間復元)

等了一會入房見姑娘, 一入去我就問我可唔可以錄音, 她說可以配合我.

我訓底, 她就禁下我下腹, 睇下dodo係邊個位置. 她話bb個size好足18週!!!
她話若果而家感覺唔到bb郁, 再過多一週就會feel到!!!
又話bb位置應該係我肚臍落一個手指位, 跟住就楂啫喱聽心跳, 叫我部手機對住speaker, 跟住數了一分鐘心跳, 期間她說dodo郁了, 所以心跳細聲左, 又再改位置再畀我聽(不過唔及威院聽果次咁清). 數完係140呀. 正常係120~150, 所以dodo係正常呀 !!!
最後話我體重沒有增加得好多, 咁樣係好事, 她說現階段不用增磅太多.
她問我仲有乜問題, 我就問肚側邊有時覺得痛, 佢話韌帶因子宮擴大而拉扯, 只要唔係持續痛楚, 按摩下休息下便沒事.

dodo用品大作戰

昨天同老公去左吉吉買dodo用品. 真係行到我地腳仔軟.
由於想要JUSCO 既DISCOUNT, 我地無J-CARD, 又唔想畀年費, 見到有AEON 信用卡申請, 免首年年費, 仲要即時申請, 真係O岩晒我地啦.

當日真係有好多野要考慮.... 奶瓶、消毒煲、入院用品, dodo衫、嬰兒床、嬰兒車、揹帶....
於是老公首先排邊d野緊要d, 放假就不停上網搵資料.

事關原本諗定揀chu chu PPSU 奶瓶, 因為同事用過, 比較過nuk, avent等牌子, avent同nuk 普通價都只係pc料, 要pes料價錢貴過chu chu, 普通PC料會刮花同每6個月換一次. 而chu chu可以用到8個月以上, 使用得好, 可以一年才換. 覺得chu chu划算很多.

但點知一到吉吉就見到英寶奶瓶, 聲稱用醫料矽膠, 十分安全, 可用10年, 耐熱超過400度. sales姐姐仲話貴買平用, 搞到我地心郁郁. 但價錢就超貴, 8oz 要155仲要唔包奶咀. 奶咀都要5x一個.
跟住同62同99飲完茶去千色店睇野, 見到英寶奶瓶sample, 真係忍唔住叫"唔係呱, 殘到咁?!" 因為個sample好舊, 仲黏左好多塵, 仲要勁花... 齋擺係百貨公司會可以殘到咁, 即刻對佢所謂醫料矽膠無晒信心... 揀番chu chu好過.

跟住再行番吉吉, 表姐就打黎同我講有乜入院野要買, 於是就買產婦衞生巾、沖洗瓶、乳墊、網褲、床墊、濕紙巾, 而BB 尿片、綿花球就遲D係藥房買. 仲有出院既dodo衣服包括短和尚袍(內衣)、長袍(外套)、包被、手套腳套、20條紗巾.

然後就買4支大同2支細奶瓶. 仲差2支大奶瓶. dodo 實好開心啦~~


老公揀梗乜?


就係揀梗dodo衫


奶樽


長和尚袍



包被


和尚袍套裝


入院用品


紗巾


嬰兒濕紙巾


大合照





佬同我雖然行得好倦, 但都好開心!!!

跟住我同老公都買下自己野, 就係一副大富翁同埋一支電動牙刷, 趁有折嘛. HEEHEE.

煲bb粥仔

近日諗起bb到6個月要食粥仔... 就開始驚啦. 因為自己勁唔識煲粥... 媽係醫院, 我煲粥給她食已經好頭痕... (唉, 講就講給媽食, 當時佢一o答都未必食到... ) 我個電飯煲煲出黎係潮州粥, 又唔滑又唔綿, 飯粒同水分開... 後來試過用電磁爐個煲粥mode. 出黎效果都ok既, 但煲個幾2粒鐘. 若果照顧bb, bb每次食得少, 次次都煲耐咪唔得了 !!!! 好想問下媽咪當年點揍我同家姐... 可能無得再問...
問99.. 佢話有bb糊粉買黎沖喎. 佢又自稱唔識揍細路.. 搞到我好擔心添...

於是自己上網搵下資料及問舊同事. 我係tw 病時亦食這位舊同事煲的粥, 真的很好味架! 不過好粥真係唔易煲, 一問就發現原來要煲一小時十五分, 仲未計醃米既時間, 仲要dodo開頭食粥仔都只係食好少, 用正常方法煲粥煲唔到咁少份量...真係好難度.

網上有人介紹真空壺焗粥令米開花跟住明火再煲20分鐘, 我都幾想試下呢個方法, 但唔知會唔會食壞dodo呢?
(老公一見到我寫, 就猛話實食壞dodo喎!!!)

實行中醫調理+運動計劃

昨天老公帶我去佢公司附近club house 游水, 跟住陪我返順利村睇中醫, 跟住再陪我入粉嶺同二哥一家食飯.

係游池, 全場無其他人, 只得2名救生員, 老公同埋我, 感覺超自在. 仲要無風吹, 游水時只有自己既水聲, 感覺好正. 諗起未落水前, 我猛喊好凍呀!!!好凍呀!!! 事關當時沒有太陽, 感覺會凍. 一落水就馬上游呀游, 感覺warm up左無咁凍. 但老公就畀我塞佢食lunch好飽, 所以狀況唔好, 佢決定唔游. 全程望實我, 我要上水抖下就拎大毛巾包住我.

睇中醫, 今次好豪咁執了七日藥. 諗住希望快d好番. 至少清左感冒, 胃部不適, 等dodo 好d. 而老公今次都一齊睇埋中醫. 希望老公腸胃好d啦, 清下熱毒.

晚上楂車入粉嶺, 諗住仲有時間剩, 想係附近睇下有無bb野啦. 點知牽晴間乜bb野都無 #__#.

而家出街不知不覺都會諗住睇bb 野, 而唔係自己野. 哈哈. 心態都改左.

今朝起身.. 真係救命... 條腰好倦呀!!! 太耐無游水啦. 所以係咁. 不過.. 唔知因游水定子宮擴張而覺得個肚子陰陰痛.. 希望唔關游水事啦. 覺得自己大肚成日都亂諗野....

牛dodo

隔了很久沒有寫blog了... 因為媽咪病重, 結婚需要突然改期, 老公急於籌備, 而我就全部精神在醫院.
每天很早出門到醫很夜回家, 一日復一日, 直到結緍前一晚才開始感覺到結婚的緊張.
一齊事情都很匆忙, 亦很傷感.

今年年初得知有可能懷孕, 感覺有點迷芒..等我憶述下當日斷定我有左既情況吧.
17/1大清早打開雙眼, 發現老公雙眼睩睩望住我, 又唔准我去洗手間, 陰陰嘴咁對住我笑.
然後, 佢話要落街買棒棒, 要我等佢至好去洗手間.

等到老公返黎, 交了棒棒結果給老公, 跟住拎說明書對下. 結果係bingo!
我聽到後, 覺得難以至信, 心想係真唔係呀?! 我地仲未去honeymoon喎, 應該好relax至有bb架嘛!!!
係咪架?! 我仲想3月同anita去旅行架噃...

跟住.. 唔知下一步應該點做, 即時諗起juana. 於是打電話給她, 她建議我馬上看醫生拎懷孕證明及到醫院排期婦產科, 及早book oscar(若果在政府醫院做).

當天開始擔心之前感冒吃了感冒成藥... 很害怕對dodo有影響, 看私家醫生問及這事, 醫生說應該無事, 但之後就不可再吃任何成藥了, 一定要看醫生, 醫生會開一些適合孕婦吃的藥.

另外, 老公擔心我同anita約了旅行, 在成事之前約她出來告訴她要消取, 當天便約了她一起食飯親口告知以示誠意. 由於姐姐當日很忙, 唯有用短訊告知喜訊了.

之後, anita陪同我和老公一齊去拜媽咪, 告知她喜訊, 希望她在天之靈都會很安慰.

第10週時去照u/s, 老公同我第一次見到dodo係我肚子裡郁下郁下, 有2.05cm長, 樣子似小蝌蚪, 發下發下. 好很意呀.
感覺更加實在了.之前一直只是覺得身體虛弱了, 很容易病, 胃口好差, 胃灼熱等症狀, 但見到dodo感覺實在很多了!!! 但是醫生說dodo的size 是9週, 即是預計少了一週. 不知是否因為我病了很久... 所以dodo唔曉大?

第12週到政府醫院照u/s, 這時dodo係5.10cm. 見到大大的頭仔, 長長的手仔, 短短的腳仔!!! 哈哈.去照oscar, 到私家化驗所, 可是當天遇到一個感覺好唔prof既醫生, 一開始就話照唔到. 點會呀?! 前兩日至照過黎. 問佢點解, 佢話因為bb郁喎. 我心想郁係正常架喎. 跟住度頸皮厚度, dr一開口就話好厚, 嚇到我死死下, 跟住又話正常. 激死我, 都唔知邊句真. 問佢仔定女, 佢又話自己無咁勁照到喎. 講野口吻好唔專業囉~ 不過見到dodo 有5.40cm. 手仔腳仔郁下郁下好似行路, 我+200蚊燒左個dvd 作留念. heehee